Vutant’ann (Ottant’anni)

La storia ca va cunti la par fin minga vera. Pense' ca la cumincia ammo prima du la guera (la storia che vi racconto sembra quasi non vera, pensate che cominciò ancora prima della guerra)

Vutant’ann (Ottant’anni)

La storia ca va cunti la par fin minga vera
Pense’ ca la cumincia ammo prima du la guera
In d’ul bel sit, pena fora vares
Na gesa, quater ca….. Quasi n’paes

Al nas in d’una curt cunt n’usteria
Piena da gent dul sit, e anca da via

Cunt un bel nom ca prumet abundanza
In pasa’ vutant’an e sa ciama ammo Speranza

Adess certament avrii induinaa
Sem dre parla’ dul Mene da Bubiaa

L’e’ ammo un balila quan sciopa la guera
Ghe minga de mangiaa ne a mesdi’ ne a la sera
Insci’ quan cal ven grant e’l diventa un malnatt
Cunt i so amiss al mangia tut i gat

Sunava un viulin, ma minga par pasiun
Se no ul Batistino la ciapava a sgiafun
E quan ca finalment la pianta’ li’ da suna’
Ghe stai tanti urecc can tira’ ul fiaa

Podi minga tira’ innanzi senza fa menziun
Dun quai amiss cal ga dai l’ispiraziun
Ul Ginu merican, il Siru pescadur
Ul Ceta, ul Negrett, in gir a tut i ur
Ma lu a diferenza de tut i’alter malnatt
I so gent l’han cunvinciu’ a studia’ de ragiunatt
E a chi temp la’ ves ragiunier, l’eva un titul nubiliar
Quasi cume un dutur, istess ca ves nudar
Infati ancamo incoo al so pasagg
Tucc ghe disen vulentera "buondi’ rag"

Parti’ sulda’, e fu n’bel tenentin
Ca’l sa credeva da vess fin un alpin
Ma quela pena ca ga fu par cumpagna
L’eva da a artiglier, se pur da muntagna

Quan ca l’ha fini’ e l’han cungeda’
Driz in banca l’e’ n’dai a lauraa
Ma subit se curgiuu ca cunta’ i danee
Quan ch’inn di alter l’e’ minga n’gran mistee

Nem innanzi cunt la storia c’adess ariva un bel
Quan ca par too miee l’e’ ndai fina a Cantell

Par un quai mes l’e’ gira’ in gir un pu’ titubant
Cercava da capi’, el sutava a fa dumand
Ma tira e po bistira, taia e po medega
Al se’ trua’ seta’ in su na cadrega

E mi a questa storia tachi nanca n’butun
Duperi i so parol "sunt burla’ denter me n’sciatun

Inscii senza fiada’. E forzi senza capi’
Al se trua’ in gesa dentar a n’bel visti’
A spusass la so Marisa dananzi dul Signur
E fa parti na storia piena da tantu amur

E subit han taca’ senza pensag a sura
A met al mund i fioo, propi da gran cariera
Ma un pu par furia, un pu par presa, un pu par impazienza
Han sbaglia’ i cunt, e fai ul prim han fini’ l’inteligenza

Ga saria ammo tanti rop da cunta’ su
Ma nem innanzi sa da no finisumm pu’
La fai mangim. E po anca ul ciculat
Ma a lauraa pa’ialter al diventava matt

Finchee un bel dì l’ha incuntraa un dutur in su la so via
Mia vun du l’uspedal’ un dutur d’ecunumia
Senza esitaziun e senza bat ul bec
Han fai na dita e l’an ciamada Elmec

Par lauraa e par fa ul propi duer
Fasevan i fatur pa chi ca fa ul buter

E dopu ul fer’, ul ciculat e tanti alter client
Che dopu qurant’an in chi ancamo cuntent

Forzi incoo l’è un pù stremii a vide stu carusell 
Che’m pica in pe’ a Gazava e dopu anca Brunell
Però ancamo incoo ca i vutanta inn bel e che sunaa
Ghe minga n’di ‘ cal ven mia a lauraa
In ogni sit el pasa, l’ dumanda, l’suvrintend,
Par ugnun un cunsili, na bona parola, n’incuragiament

U scrivu’ tantu, ma l”è mia asè a fag unur
Quel ça la fai, la sa dumà ul Signur
Par di’ tuscoss ga vor ben altar ca na puesia
Ga vuraress un liber, anzi n’enciclupedia

Incoo sem chi tut i fioo e i neut, ca sem nanca quanti semm
Cunt i’amiss da ogni cantun, e tucc ghe vorum ben
Sa stringium cunt’afett e cunt’ un bicer da vin
Per fag cunt’alegria mila auguri e vutanta volt cin cin

Redazione VareseNews
redazione@varesenews.it

Noi della redazione di VareseNews crediamo che una buona informazione contribuisca a migliorare la vita di tutti. Ogni giorno lavoriamo cercando di stimolare curiosità e spirito critico.

Pubblicato il 07 Settembre 2014
Leggi i commenti

Commenti

L'email è richiesta ma non verrà mostrata ai visitatori. Il contenuto di questo commento esprime il pensiero dell'autore e non rappresenta la linea editoriale di VareseNews.it, che rimane autonoma e indipendente. I messaggi inclusi nei commenti non sono testi giornalistici, ma post inviati dai singoli lettori che possono essere automaticamente pubblicati senza filtro preventivo. I commenti che includano uno o più link a siti esterni verranno rimossi in automatico dal sistema.

Segnala Errore

Vuoi leggere VareseNews senza pubblicità?
Diventa un nostro sostenitore!



Sostienici!


Oppure disabilita l'Adblock per continuare a leggere le nostre notizie.